2011年4月17日星期日

濫情易招尷尬(雞蛋仔阿伯事件)

向來認為憐憫與慈悲必須以智慧做根基,「雞蛋仔阿伯事件」再次證明部分港人,濫情有餘,理性不足。或許是忙無法用腦,或許是懶不想用腦,或許是蠢無腦可用,或許是精過快用腦…。不管是那種, 欠缺冷靜的同情心,足以扭曲「香港精神」,破壞社會安寧。
法理情,如何排序?責任不在執法者。食環署按例執法,是職責所在。講理求情,對象是法官。要求執法者以情理出發,十分危險,容易衍生不公不義。違法者背後都有故事,難道要求執法者現場主觀判斷履行任務與否?
吳伯無牌經營30年,近10天內三度被食環署拘捕及票控,只能說明食環署昨非今是,終於肯做嘢,而吳伯確實頑蠻不寧,屢犯不改,公然挑戰香港法律。是非黑白清楚不過,結果卻是犯法者做了「聖人」,執法者被千夫所指,部分港人的指鹿為馬神功真是登峰造極。 
有人怪責是傳媒報導失實,讓人誤解,又是那個雞與雞蛋誰先的問題。有怎樣的市民,有怎樣的傳媒,互相賴帳,累鬥累。這類煽情新聞經常出現上、下集。上集,當事人都被追捧成「天使」。下集,忽然逆轉,「天使」變「魔王」,追捧者搥胸頓足喊受騙。戲碼十年如一日,陳舊迂腐,毫無新意,呵欠連場。
單憑視覺與聽覺,很難明白人。最普通的人,少不免有幾幅面具傍身。要看穿面具下的真象,需要生活智慧。人老精,鬼老靈,74歲的老人能在臥虎藏龍的大坑打混30年,多少擁有「見人講人話,見鬼講鬼話」的本事,稍欠智慧,難辨真偽。
今回數尷尬之最,莫過於公民黨的余大狀,錯抽穢水。余大狀越活越回頭,好嘅唔學,壞嘅學齊。人家(80後社運戲子)衰了,還可賴年輕,入世未深,遭人利用。余大狀可以賴甚麽?越老越糊塗!難怪有人說,千萬不要玩政治,政治會使人變蠢。

11 則留言:

  1. 食環署受美式管理所累,要盲目交數
    現時兵多過賊,唯有不斷重拉
    這是體制上的問題

    小販不單是社會一條生路
    也是一種旅遊特色
    趕絕了,香港對比台灣東南亞在旅遊上的競爭力又減了一截

    說政府無錯,傳媒瀆職,市民無腦,政黨抽水,只是三幅被
    如何將小販跟商戶並存才是要思考的問題

    回覆刪除
  2. Re 黑人:我當然是三幅被,要有你這種智慧才能加一幅被。

    回覆刪除
  3. 我亦感到時下多了煽情新聞,但想不到信的人又多了。

    回覆刪除
  4. 貓姐是三幅被,三幅別人不敢、不肯講的被。黑人是一幅被,一幅似現今政客的被:只提問題,思考和解決是別人的責任。

    回覆刪除
  5. Re Aelvin & 柒加伍 : 社會風氣如此,神仙也難救。

    回覆刪除
  6. 柒加伍

    毋須這般上綱上線,把我和政客抽水聯想在一起
    套用你的邏輯,你也是只懂指責別人,不懂思考和解決問題吧?

    一定要「思考和解決問題」才是「正確」,那麼天下間所有評論員和分析員都可以收皮

    當然,假如你真的認為評論員和分析員都是多餘的,那我只好說大家的世界觀差異太大,多講無謂了

    回覆刪除
  7. //一定要「思考和解決問題」才是「正確」,那麼天下間所有評論員和分析員都可以收皮//
    不嬲都應該收皮﹐好多所謂評論員根本就係呃稿費﹐浪費地球資源(笑)

    //小販不單是社會一條生路
    也是一種旅遊特色
    趕絕了,香港對比台灣東南亞在旅遊上的競爭力又減了一截//
    你話建議政府重發大牌檔牌﹐還講得通
    問題係重新發大牌檔牌﹐當初起咁多公共街市同熟食中心﹐又有何用﹖
    其次﹐容許熟食小販擺檔﹐何解會係一條生路﹖
    旅遊特色﹐就仲好笑﹐你幾時見過鬼佬係街邊桔魚旦﹖
    你把口話要思考小販跟商戶並存﹐但我相信你根本連以前個小販大牌檔發牌制度﹐以及後來點解要取締的歷史﹐你都未搞清楚﹐思考咩先﹖
    好啦﹐我地思考一下啦﹐要比人係街邊搞生意﹐維園每個禮拜都有位比人搞攤檔﹐算唔算比人創業﹖
    唔通一定任人周街擺檔﹐先叫生路呀﹖
    比人周街擺檔﹐你點管理﹖
    再講﹐即使以前容許發小販牌﹐都唔會發比熟食小販的﹐因為存在衛生監控問題
    話人唔思考﹐你既然話香港應該重發小販牌﹐你認真思考嘈音﹑會唔會阻街﹑咩地方適合擺檔﹐以及點做衛生監控問題先啦﹐唔該!

    回覆刪除
  8. >文少

    你講到所有評論員都係浪費地球資源咁偏激,已無謂多談了

    小販係旅遊特色好咩咁好笑呢?檳城曼谷台北大把手推小販,伯恩和多倫多人流夠的地方,都有兩檔熱狗汽水同埋都甩檔,你舉例都唔好揀d自己唔知的東西亂舉啦

    回覆刪除
  9. 超﹐未諗過技術問題﹐就唔好找籍口避開唔答!

    又講真﹐我又真係唔覺得外國有熟食小販﹐好明顯﹐人家原意就唔係保留乜鬼旅遊特色囉﹖

    又其實﹐香港油尖旺銅鑼灣﹐一樣有梗檔做港式小食生意
    如果用港式小食做旅遊賣點的話﹐梗檔就無selling point呀﹖偏偏要推車仔至有賣點呀﹖

    話商戶同小販平衡﹐點平衡﹖你知唔知銅鑼灣﹑MK果幾檔賣小食的檔口﹐幾錢一個月﹖你話比人係街推車仔﹐班友推去MK度爭生意的話﹐班檔主咪好可憐﹐D租白比呀﹖

    哦哦哦﹐班檔主可以執笠ga﹖然後個個推晒D車仔出來﹐周街賣魚蛋呀﹐好似當年缽蘭街﹑上海街一樣囉﹖到時何止賣魚蛋有商機呀﹖古惑仔仲可以收陀地添呀﹖

    陀地分唔勻﹐格屎傾唔埋﹐咪開片囉﹖七﹑八十年代劈得少咩﹖

    你好大聲叫人思考ga﹖又要串人三篤屁﹐到人家真係問你技術問題﹐就借D易迴避...

    你玩躲避球好叻呀~~曾蔭權需要你呀﹐快D申請做AO啦!!!

    回覆刪除
  10. > 文少

    我有睇開唔少你的post同博文
    覺得同你拗係非常浪費時間

    例如我話外國一樣好多熟食小販,你就話唔多覺外國有熟食小販,咁就當冇囉
    呢d已經係信仰層面,你不信則無
    我見過,所以我信有好多

    你話熟食小販衛生監控有問題,我會話餐廳大鑊好多,小販d貨去得快,反而無事

    呢個亦都係信仰層面,你覺得黃大仙定係瑪利亞邊個靈d一樣,無數字,係你自己生活主觀見解

    宗教唔同,拗落去棧浪費心機時間
    我打呢篇野都係為左說明呢個fact,講完就算了

    回覆刪除
  11. 凡係認真討論的話﹐都係會浪費時間
    好似你呢類隨口噏﹐放嘴炮窒人三篤屁﹐就一定唔會浪費時間
    既然怕浪費時間﹐就唔好扮勁叫人思考啦﹖
    學其他地球人咁﹐齋放嘴炮就得啦﹖

    你窒得人三篤屁﹐話人無思考﹐定必你思考好多啦﹖

    外國熟食小販問題﹐我寫得唔清楚
    我係話我唔覺人家係為左搞D旅遊特色出來﹐所以會有地攤賣熱狗的
    明顯﹐如果有所謂旅遊特色﹐只不過係bonus

    旅遊特色問題﹐繼續留清辮都好有特色ga﹖
    你叫政府鼓勵港人留清辮la﹖

    又事實上﹐好明顯唔一定要周街小販就有特色
    如果港式小食可以當作特色的話﹐唔洗推車仔一樣可以有特色

    另外﹐我講的平衡商戶利益問題﹐治安問題﹐阻街問題﹐乃至衛生監控問題
    從來唔係信仰問題﹐而是可以做調查研究﹐得出量化數據的
    例如﹕平衡商戶利益問題﹐你係可以調查研究﹐得知MK老銅的商鋪尺價
    乃至你可以做實驗﹐試下係人家魚蛋檔面前推車仔﹐會槍走幾多生意

    例如﹕治安問題﹐你絕對可以走入O記﹐翻查以往黑社會收保護費﹑爭地盤的案件紀錄﹐當中有無同有幾多牽涉到小販擺賣

    例如﹕衛生監控問題
    現時食肆是要發牌的﹐由於是梗檔﹐衛生幫可以定期抽樣檢查
    推車仔是流動的﹐衛生幫點定期抽樣檢查﹐呢類技術問題﹐都可以做實驗以作出評估
    又可以從食環署檔案中﹐查出推車仔檔有幾多衛生問題﹐例如大腸幹菌含量

    所有技術問題﹐皆可做調查研究所得﹐關所謂價值觀乜事﹖
    仲話學人講fact﹐你第一番說話﹐大部份明明係judgement
    例如﹕所謂旅遊特色﹐相比我講的治安﹑衛生﹑人流﹑商戶利益流失呢類技術問題﹐又點做stactical research﹖
    呢D你都敢話係fact呀﹖
    你話的生路﹐明明有好多可替代option﹐你偏唔提﹐又係fact呀﹖

    思考wor~~你仲講乜主觀客觀呀﹖
    隨口噏﹐噏兩句就插人三篤屁
    你D思考方法﹐勁過李天命添啦﹖

    回覆刪除